أمثال سورية

موضوع: أمثال سورية الإثنين مارس 17, 2008 2:14 am

اللي ما داق المغراية ما بيعرف شو الحكاية

الجنازة كبيرة و الميت كلب

كل الميت ما حرزان الجنازة

توب العييره ما بيدفي ولو دفا ما بدوم

علمناهم الشحادة سبقونا عل البواب

القرد بيعين امو غزال

ضربني وبكى سبقني واشتكى

اللي ما بيعرف يرقص بيقول انو الارض عوجا

اللي ما بيطول العنب بيقول عنو حامض

اللي استحو ماتو

ياقلبى ياكتكت خد الكلام وأسكت

دلقو القهوة من عماهم قالو خير الله جاهم

القرعة تتباهى بشعر بنت أختها

قالو جمل طلع النخلة هي الجمل وهي النخلة

قال يابا شو احلى من العسل قال الخل لو ببلاش

تاجرنا بالكفان بطلت الناس تموت

فارة وقعت قالتلا القطة اسم الله ، قالتلا انت بعدي عني وانا بالف خير من الله

بيقتل القتيل وبيمشي بجنازتو

اذا حلق جارك بل دقنك

اذا كبر ابنك احلق دقنك

الي بياخد من غير ملتو بموت بعلتو

مكتوب على باب الجنة مافي حماية بتحب كنة

الحكي الك يا جارة واسمعي يا كنة

دق الحديد وهو حامي

تيتي تيتي متل ما رحت متل ما اجيتي

رجعت حليمة لعادتها القديمة

مو كل مين صف الصواني صار حلواني

يلي بدو يعمل جمال بدو يعلي باب دارو

يللي بيتو من قزاز ما يرمي الناس بحجارو

يا مآمنة بالرجال متل المي بالغربال

خنفسة شافت بنتها عالحيط..آلتلا تؤبريني متل اللولية بالخيط

لا تئول عنب ليصير بالسلة

آل يا رايح كتر منايح

كسرنا الدف وبطلنا الغنا

ما بتعرف خيرو لتجرب غيرو

اذا كان حبيبك عسل لا تلحسو كلو

كل قمحة مسوسة الها كيال أعور

أول الرقص حنجلة

خبي قرشك الأبيض ليومك الأسود

طب الجرة على تمها بتطلع البنت لامها

كل مين تجوز أمي صار عمي

يا آخد القرد على مالو....بيروح المال و بيضل القرد على حالو

خبي العسل بجرارو لتغلا أسعارو
`
جبنا سيرة الإط إجا ينط.

لا تنام بين القبور ولا تشوف منامات وحشة.

الباب اللي يجيك منو ريح سدو واستريح.

قالولو للكذاب تعا حليف ، آل إجانا الفرج.

من قلة الخيل شدوا عالحمير سروج.

اللي بيعرف بيعرف واللي مابيعرف بقول كف عدس.

العز للرز والبرغل شنق حالو

ياداخل بين البصلة وقشرتا مابنوبك غير ريحتا

اللي عم ياكل العصي مو متل اللي عم بعدها.

يا سراجين وشمعة يا عالعتمة جمعة

الإيد اللي مابتقدر عليها بوسا وادعي عليها بالكسر

يامسترخص اللحم عند المرق تندم

هين فلوسك ولا تهين نفوسك

إذا جار عليك جارك, حول باب دارك

كوم حجار ولا هالجار

الجار جار ولو جار

يا مستعجل وقّف لقلّك

حامل السلّم بالعرض

طلع الشعر على راس لساني

رضينا بالبين والبين ما رضي فينا

مين خلّف ما مات

وردة بتخلّف شوكة

الضحك من غير سبب من قلّة الادب

منمشي الحيط للحيط ومنقول يا رب السترة

متل الحمّام ومقطوعة ميتو

ضايعة الطاسة

اللي استحوا ماتوا

فخّار يكسّر بعضو

أكبر منك بيوم أفهم منّك دوم

بصلتو محروقة

متل الأطرش بالزّفة

لا تكتّر على أمك وأبوك بيكرهوك

الغايب عذرو معو

العين مغرفة الكلام

العين بصيرة واليد قصيرة

يا جاري , إنت بحالك وأنا بحالي .

يا متلنا تعوا لعنا

بعد الأب الك رب ,بعد الأم احفر وطم

إذا مات بلال, ما بيبطل الأدان.

إذا ما لقى حدا, تبقى يرجع.
(يقال للتشفي , عند موت من يكره )

إذا ضاقت عليك المخازن, خلي مخزنك عبك.

إجا للعميان صبي, قلعوا عيونه باللحمسة.

إبن الشيبة, خيبة

إبن آدم لولا الظنة ,دخل الجنة

آب اللهاب, اقطوف العنقود ولا تهاب

أحسن ما تقول له كش, اضربه واكسور رجله

إذا بدك تحيره, خيره.

إذا ما خربت, ما بتعمر.

إذا اشتغلت بغير كارك , بتتعب أفكارك

إذا الله حب عباده, فرجاهم على بلاده

إذا بدك تستريح شو ما شفت قول مليح

إذا راح الغالي لاأسف عالرخيص.

إذا فاتك الضاني عليك بالحمصاني .

إذا القاضي راضي , ليش الكلام عالفاضي

اشتغل بقرش , ولا تكون بطال .

بيحسد الأعمى على كبر عيونه

بعد الكبره , جبه حمرا .

البرد والقلة , سبب كل علة

البدوي ما بنام , وتحت راسه حلاوة .

بحصّل من الأقرع شعر

بحط الحزن بالجرن.

بالمال ولا بالعيال

يا كحلا من تمك أحلى.

يقطع خملك .

موضوع: رد: أمثال سورية الإثنين مارس 17, 2008 3:53 am

ههههههههههههه
يسلموووووو اماسي يعطيكي العافيه

زائر

موووضوع جميل
شكرا امااسي

ابو نااصر